ZISTERREN IBILBIDEA ( Lehenengo etapa)

Ibilbidearen mapa

Oporrak gertu daudenez,  bestelako aukera aurkeztu nahiko nuke: Zisterren Ibilbidea. Ibilbide hau hiru monasterio zistertar inguruan antolatuta dago: Santa Maria de Vallbona, Poblet eta Santes Creusen inguruan, hain justu ere.
Bidean monasterioak ezagutzeaz gain, zenbait herri eta paraje natural bisita daitezke. Gainera, bertako historia, gastronomia, eskulangintza etab. ezagutu ahalko duzue. 

Gauza horiez guztiez gozatzeko hiru etapatan egingo dugu bidaiatxoa, autoz, bizikletaz edo oinez zeren oso ondo seinaleztaturik dago. Eta zirkularra denez, edozein monasteriotatik has gaitezke. Ni Vallbonatik hasiko naiz, eta etapaz etapa egingo dut.

SANTA MARIA DE VALLBONA

Vallbonako ikuspegi orokorra

Urgell-eko eskualdean (Lleida) kokatua dago Vallbona de les Monges udalerrian.
Monasterio hau XII. Mendearen hasieran sortu zen, eta Kataluniako emakumezkoen monasterio zistertar inportanteena da. Historian zehar nobleziako emakume askok bete zuten abadesa kargua
XIV. mendean goreneko unea izan zuten, baina XV. Menditik aurrera hasi zen monasterioaren gainbehera. XIX. mendean, Mendizabal-en desamortizazioagatik, komunitatea joan egin zen, baina sei hilabeteren buruan mojak bueltatu egin ziren.
Espainiako gerra zibileko garaian komunitatea joan egin zen berriro, eta eraikinek hondatze handiak jasan zituzten. 1986 eta 1997 urteetan zaharberritu zuten, eta gaur egun zenobio-bizitzak jarraitzen du.

Elizaren nabea

Klaustroa

Arkitekturari dagokionez erromanikotik gotikorako trantsizioaren eredua da. Elizak nabe bakarra dauka eta gurutze latindarreko oinplanoa. Klaustroan nabari dira eraikuntzako garai ezberdinak estiloagatik ez ezik, baita abadesen armarriagatik ere.Gaur zenobioak ostatu txikia baina modernoa dauka eta han gera zaitezke.

Tallat menditik panoramika

Zer egin daiteke Vallbonan monasterioa bisitatzeaz gain?

Lehenengo, herria bisitatzea. Zenobioaren inguruan sortu zen herria eta Erdi Aroko egiturari eusten dio.
Gero ibiltzea gustatzen bazaizue, txango polita egin daiteke Tallat mendira. Bide zirkularra da, 16 Km inguru ditu eta 804 mko altuera. Hala ere,  420 m bakarrik igo behar dira.
Zer gehiago? 

Vallbona inguruan zenbait herri daude eta haietan produktu bereziak egiten dira. Verdúko  zeramika beltza famatua da, eta han Jostailu eta Automaten Museoa dago, oso polita eta interesgarria; Agramunt-en bertako turroiak eta txokolatea;

Verdú

Gimeràko kale bat

Tàrrega, Maldà, Guimerà, … herri guztiek erromaniko eta gotiko aztarnak dauzkate, eta guztietan jatorrizko deiturako ardoa eta olioa ere dasta dezakezue.


Hurrengo etapa: Vallbona de les Monges – Santes Creus 45,3 Km.
Eta orain, eskema txikia bidea argitzeko.